回想大半年前，Ginny說她要參加2009東亞運動會義工服務計劃，問我有沒有興趣。結果不知怎地我也參加了第2輪的義工招募。

義工招募的面試實在是一次很有趣的經驗。我不算老，但再度看見一群還正在唸書的年青人，帶著未能戎掉的”I agree with you”和滿腔衝勁熱烈地參與小組討論，感覺像回看以前的自己。

很快便知道通過了所謂的甄選，正式成為資訊科技組義工。由4月到10月基本上相當清靜，幾乎忘了這個活動。期間上了兩三次訓練，講座形式的那種。到了10月尾至11月開始選擇工作崗位，我原本只選擇了場地單車和公路單車，後來因為種種不知名原因，己選取的時間又被重新編排。工作的時數不足以令我得到大會頒發的証書，但管他的:反正對我來說這証書有什麽用呢？難不成我見工拿出來嗎？還是表起來在家欣賞?

終於到了義工服務開始的日子，老實說，資訊科技組的工作量比起其他組別算是輕微：反正每個場地都只有數部已設置的電腦，比賽計時計分有大會指定公司Swiss Timing的工作人員處理，那你還想幹什麽？結果這幾天的工作如下：

12月5日 ﹣ 中央圖書館媒體中心

• 開啟所有電腦 （約40﹣50部）
• 更新防毒軟件資訊並進行病毒搜尋
• 零星的現場技術技援。很抱歉，我當日實在幫不上什麽忙

12月6日 ﹣ 舉重 （荔枝角體育館）

• 更新防毒軟件資訊並進行病毒搜尋
• 成功連接PRINTER一部

12月9日 ﹣ 游泳 （九龍公園泳池）
呆坐半天，幾乎電腦也沒見過。

12月9日﹣ 曲棍球 （京士栢曲棍球場）
協助Tissot工作人員作即場技術紀錄（如射門次數，封阻次數等）。但其實已經有在場義工跟進，實質我沒有參與。

12月10日 ﹣ 公路單車 （八號幹線）
最有意義的一日。除接駁電腦等事宜外，最重要是替大會在每位參賽選手的單車安裝（賽前）及拆除（賽後）計時器。第一次見到黃金寶真人，比我想像瘦很多。洪松蔭為是日比賽旁述，非常生動有趣，且偶有金句：“波係圓既, 單車”碌”都係圓既!”

總括來說，我沒有對這個運動會有太多抱怨，自已也不算投入（無論時間上或精神上），沒資格說這裹有什麽的不是。當然，我覺得有些地方的確可以小心一點，做得更好及交代得更清晰。

今次活動我最大的得著，是從一些義工身上體會何為Professional：不要爭先恐後和運動員拍照；不要在賽區或工作間大吵大讓；不要開著大大個Facebook，攤開大大份報紙，有如昭告天下般告訴你：我沒舍事幹，別煩我；不要在工作時間睡覺；不要管多餘的事，了解何為份內的事。

祝願各義工（包括Ginny) 及大會工作順利吧!

No related posts.

由上次寫blog到宜家我都係維持一個星期練一次跑左右. 臨比賽前兩星期自己試過跑左兩次8km, 時間都係55分鐘左右. 心諗:都係到時真跑先打天才波算數.

到左比賽果日 ﹣ 11月29日, 晨咁早5點起身, 稍事梳洗一下就出門撘的士去新城巿廣場pick up point度等大會既接駁巴. 巴士大約6點出發, 印象中唔駛半個鐘就出到去廸士尼, 認真快得緊要.

集合地點已經有好多人黎左, 遠處見到一連串既臨時廁所. 由於我唔係好慣咁早起身 + 食野, 一到步頓覺內急. 趕忙趁未集合衝去攪攪佢…由於一般人去果度既臨時廁所都係小解, 見我係入面咁耐, 有人忍唔住拍門問: “入面係咪暈左?”. 都幾攪野…

去完廁所係行李寄存處附近做熱身, 撞到跑半馬既Panda. 天慢慢開始光, 半馬既朋友出發了. 我地寄存埋d行李, 約7:20左右Ginny就到. 同幾個有出現既同事同埋Ginny既排球波友一齊影下相, 我地就走去排隊等出發. 是次活動有成8000幾人參加, 其中有3000幾係參加半馬既. 等待開跑果時有少少毛毛雨, 但無減我地既意志! 終於到左7:45….出發!!

由於我都幾緊張下, 開始跑既時候覺得心跳好似比平時快左. 不斷同自己講: “盡量控制自己既速度, 唔好跟人跑”, 頭1km基本上係勁讓人過. 去到第1km既時候睇下錶: “6分17秒“: 哈, 好似已經快過原本所想既”每7分鐘1km”. 不過唔理, 正所謂”唔好比佢停”, 繼續保持呢個速度跑.

跑到3km左右開始上一條公路既斜路, 見到前面既人開始慢返落黎. 慢慢地感覺到身體已經適應左宜家呢個速度. 好驚之後唔夠氣, 不過again, “唔好比佢停”…唔理, 繼續跑.  上到斜路一半已經見到對面線阿Kane落緊黎…真係好勁.

大會每1km 放一個牌話你知你跑左幾多. 我懷疑佢地發錯左4km果個牌, 因為我去到4km果時不過22分幾, 但我跑左好耐先去到5km. 後來問返同事同埋上facebook都見有人投訴呢個錯誤. 4km附近有水站, 隔離仲有”放水站”. 由於我係拎住支細水跑既, 同埋好多人, 所以都冇行埋去拎水飲. 剩係知個地下真係好濕…

5km打後基本上都算係係公園入面跑, 自己都開始慢返落黎少少, 越來越多人由跑變左行路. 唔覺唔覺去到7，8km, 條路開始變得好窄. 最慘半馬既高手已經追到黎, 攪到大家好似爭路咁左閃右避好難跑. 睇facebook有d高手埋怨大會安排得差, 因為佢地比好多10km既人阻住佢地; 同樣地, 我地又唔多高興好多高手用手撥開我地, 等我地開條路比佢地”創造傳奇一刻”. 無論如何…平常心睇呢件事, nobody’s fault. 總之我想係盡少少力跑完佢去幫UNICEF籌款同埋挑戰自已, 係咁多.

終於過左8km, 覺得自己都仲有貨. 決定繼續維持住個速度, 等9 - 10km先發出黎. 途中見到跑半馬追到上黎 + 過埋我既同事Matt (結果佢以1小時45分跑晒半馬…勁). 去到9km, 好近啦! 呢個時候見到另一同事Yuen Man係前面, 一於試下放埋d力出黎捱2km!!

爆左一陣…發現原來我係無貨, 哈哈. 完左9km即入返死狗mode. 個肚 (定唔知胃定腸) 已經”毑”住…最後1km真係幾辛苦, 不過知道就黎捱完, 頂住…!! 依喂….你宜家先拎個500m牌出黎…? 我唔係就到啦咩…..

最後衝刺啦終於!! 跑道兩邊已經好多人同好多相機”捕係度”. 望左一陣係左邊搵到係終點等我既Ginny, 好開心!!!! 終於完成左我第一次既10km跑!! 望下錶, 時間係1小時3分14秒.

跑完個人都幾浮…辛苦過平時去跑步會. Cool down既時候其他朋友都陸續返到, 我地拎返行李, 還晶片, 又繼續我地影相活動, 之後再去食早餐, 結束左呢個慈善跑.

好滿意自已做出既時間, 因為原本都係諗住要1小時10分左右先攪得掂. 另一樣滿足係因為今次其實都唔算係齋跑, 同時我地亦都係做緊善事. 係度先多謝阿Kane同威廉叫埋我去跑步會練習, 今次既成績絕對係訓練既成果! 最重要當然係多謝Ginny咁遠入黎支持我，真係好開心!! 期待2月既渣打馬拉松!

No related posts.

故事既原著原來係1973年寫既, 之前已經先後係1974年同1998年拍過電影. 冇比較過書同前作, 不過我覺得成套戲都幾好睇冇悶場. 雖則佢唔算有好多追逐, 槍戰鏡頭, 但兩個素未謀面既人透過列車廣播系統黎決定成個車廂乘客既生死都夠晒緊張刺激.

成套戲既重點我諗都係係晒兩大巨星身上. Denzel Washington其實我唔係好記得我睇過佢邊套戲…我其實以前好少睇西片… 不過佢焗認自己犯左法果一幕真係幾好睇. John Travolta 有d驚喜, 我印象中既佢係笑笑口肥肥仔咁 (當然後生果陣好型…), 冇諗過做呢個騎劫火車既”恐怖份子”做得咁有型.

話晒呢套戲都已經係1973年寫, 又已經拍過2次, 今次點都要加少少現代d既原素. 例如係架火車度上網玩video chat. 但最抵死都莫過於佢個火車控制中心既火車tracking system. 睇落真係勁過你射火箭上太空…唔知香港既MTR有冇一個咁好既tracking system 呢.

故事個結尾我其實唔係好明白…不過我諗電影通常都會留返少少空間比人諗下野既…

No related posts.

星期四晚終於去左伊館睇黃子華09棟篤笑 - 嘩眾取寵. 今年係第2次現場睇黃子華, 對上一次已經係2007年既”越大鑊, 越快樂”. 家姐好早已經睇左SHOW, 返黎既評語係: “睇’絕代商驕’好過去睇佢個SHOW”. 雖則我好少睇果套電視劇, 不過若然話個SHOW差過套劇我都真係會幾失望…無論如何, 一於自己証實下.

我地係用中銀信用卡優先訂飛既, 諗住都應該OK. 點知去到現場個位真係差得緊要: 山頂都不是問題, 最慘係山頂果排既第一行欄杆位, 仲要前面有塊玻璃擋住. 唯有同自己講: “唔緊要…你黎聽佢講野O者, 唔係睇樣”…

8:15分個SHOW正式開始, 唔係睇得好清楚佢既造型, 但”回水”同”除褲”之聲不絕於耳. 個SHOW既詳情唔講, 我總括地覺得好睇過”越大鑊, 越快樂 (2007)”, 但比起之前係DVD睇既”兒童不宜 (2006)”同埋”無炭用 (2003)”都好似冇咁好. 講開佢D舊作, 另一個我好鐘意既SHOW係”秋前算帳“, 講當年97, 64既話題…好中

不過無論如何, 有一類題目係佢咁多個SHOW我都覺得好笑既, 就係”男女關係”. 我特別鐘意”兒童不宜”講女人講大話, 同埋講男人既三不主義果part, 好好笑 (haha, 唔知講乜既去租隻碟睇返).

身邊都唔少朋友覺得黃子華既show越來越冇咁好睇. 或者佢個show既內容同format都已經好固定冇乜驚喜. 不過作為一個fans… 我諗我鐘意佢個show既地方反而有少少”見老朋友”既感覺 (儘管我既”棟篤笑齡”好短). 入場後我會”哈, 睇下你又有乜野講先”之餘, 又或者”哈, 你又講呢個topic, 不過又幾好笑”, 然後又有一輪熟悉既”回水“同”除褲“陪住你, 好似參加左一個一年一度既傳統既節目咁.

雖則一如以往, 我總係唔明白佢最後埋尾故事背後既意義… 希望下一年佢都會繼續做, 我會繼續支持 !!

No related posts.

成個web site其中一大難題係佢係全Flash, 但又要夾住用個CMS (Content Management System). 不過我好快就知道我唔駛擔心呢樣野, 老細Gemma 另有安排: 我負責既部分係幫Peninsula做一個新既網上訂房系統 (Web Booking Engine, 簡稱WBE).

過去呢一年我好大部分時間都係o係度做WBE, 做到成日比人問: “點解你要做咁耐?”… 我都唔識答, 但我只能夠話我盡晒力, 真係要做咁耐. 做WBE最困難既地方係要夾酒店本身既訂房系統, 而且每一個訂房既步驟都有好多既checking, 真係需要好多時間去理解酒店既運作同系統既邏輯. 我會話雖然個過程好痛苦同有d悶, 但最終學到既野都幾得意.

事隔成年, 今晚Peninsula呢個projet既大佬好慷慨地請我地成個project team去Peninsula Hong Kong既Spring Moon (嘉麟樓)食中菜慶功.

成晚個氣氛都唔錯, 見返好多係之前做training既時候認識既客人. 我地分左兩圍坐 (大佬一圍, 我地呢d細既一圍), 咁arm我就編左坐係之前training見過既Lilian (Peninsula PR 部門) 隔離, 成晚聽左唔少關於Peninsula既故仔, 都幾過癮.

飲飽食醉, Peninsula 仲比左一個驚喜我地: 一個疑似Peninsula web site既蛋糕, 上面寫左一齊參與呢個project既人既名:

都真係幾攪笑. 不過佢個樣攪笑, 食落就真係普通, 聽講個蛋糕唔係Peninsula既作品. 反而佢地既美點雙輝 (煎堆仔 + 月餅) 同埋個芒果布甸就好好味.

係呢個時候, 忽然間懷念當年同我一齊奮戰呢個project既RK. 同佢夾得真係算幾開心, 同埋都得到佢好多既意見. 雖則佢已經去左第度搵好路數, 今日又冇黎到…無論如何, 係度敬你一杯! 飲!!!

No related posts.

自己一個人跑反而維持到個速度幾穩定. 呢10個圈既400m 我既速度都可以維持係1′ 50 - 1′ 55之間. 當然, 越後果d圈就越想死啦. 不過亦因為係得自己跑, 冇咁好鬥心, 冇上次跑得咁快.

仲有3個月時間!!!

Related posts:

• 跑步練習 [2009-08-01]
• 跑步練習 [2009-08-26]

原本今次想跑多少少: 一口氣跑6.4 km (16個圈). 不過跑到第12個已經想死, 最終都只可以跑到15個 (6 km). 不過今次跑6 km 快過之前係將運澳跑好多, 用左39分鐘跑完. 認真地計返條數: 一個鐘以呢個速度其實都只係跑到9.3 km 左右. 而以我現階段既能力, 要以呢個速度維持7 km 都好難, 莫講話係9 km.

下個星期二同個客食飯, 又冇得去練. 唉. 咁攪法真係死死地…

總結:

總距離: 6km
時間: 39′ 00
速度: 9.3km/h

Related posts:

• 跑步練習 [2009-08-01]
• 跑步練習 [2009-08-30]

星期六我地有一整日可以陪Tomoko去玩, 以下既地方都曾經係考慮之列, 不過各有原因去唔到:

• 海洋公園: 上個月先去完
• Disney: 3月去左
• 昂坪360: 原本都打算去呢個, 點知佢忽然間話要維修6個星期, 去唔成

最後, 我地揀左呢期都幾多人去既挪亞方舟 (Noah’s Ark).

去挪亞方舟要買定飛, 根據佢地官方網頁, 佢係建議你上網買飛既, 聲稱現場只係得少量門票比你買. 雖則我去到既時候(大約4:30) 都見仲有飛賣. 佢地既門票分4種, 詳情可以去呢度睇. 由於我太遲訂飛, 結果得返去得最少地方既挪亞套票 (HKD 90 一張).

去柏麗灣從水路去都幾方便, 中環同荃灣都有船. 由中環2號碼頭出發, 去到柏麗灣都只係需要約20分鐘. 往返柏麗灣同中環既船係每30分鐘一班, 搭正同搭半都有船. 順帶一提由荃灣去既話都好方便, 係荃灣碼頭 (荃灣西站出面) 去柏麗灣都只係10分鐘. 我地上午食飯同購物用多左時間, 攪到成3:40先去到中環2號碼頭, 結果要坐4:00果班船, 4:20先入到去.

挪亞方舟基本上都唔算難搵, 係柏麗灣碼頭一落船都已經望到. 沿住近沙灘既大街行10分鐘就到. 去到正門埋去拎飛, 拎完個售票員同我講: “方舟多媒體館最遲5:15要入去, 大自然公園最遲5:00要入去”. 我以為大自然公園 (佢d名好亂, 大自然公園即係馬灣公園既第一期) 冇時限, 點知原來5:00前要入去…怪就怪自己睇得唔清楚啦, 不過都無法子, 時間又唔夠, 結果取捨之下都係去方舟多媒體館同方舟花園, 穩陣.

入到去原本就走左去方舟多媒體館, 好彩Ginny醒目捉返我地去左方舟花園影相先. 反正, 對我黎講, 方舟花園影相先係主旨o麻. 由於天氣相當好, 影出黎d相都唔錯. 不過又真係天氣好得滯, 影左15分鐘都已經濕晒. 方舟花園快速地走馬看花其實又唔駛好耐既, 當然, 若你係影相發燒友, 咁靚既景加埋青馬大橋, 真係可以玩好耐.

去完方舟花園就跟手入去方舟多媒體館. 方舟多媒體館入面都分左4, 5 個館仔, 每個館都有佢既主題. 可能真係教育意義太重同埋又有少少宗教背景, 唔算特別吸引. 全程都係廣東話, 唔知有冇悶親日本朋友呢 :p

總括地由於時間所限, 有少少遺憾入開黎都去唔到馬灣公園度影下相留念. 我覺得若然你有小朋友又或者有宗教信仰, 又或者你好鐘意影相, 呢度真係不失為一個好地方. 最後希望Tomoko 享受今次香港之旅啦!!

No related posts.

係同一set入面, 每一個圈之間既休息時間係跟據同組人跑得最慢果個黎計: 例如全組最慢果個人要跑2′ 30先跑得完, 成組就會有由最後一個人返終點起計2′ 30既時間休息. 若然我只要1′ 50就跑完, 我就會有2′ 30 + 40 秒 = 3′ 20 既休息時間. 聽落都真係舒服過之前好多.

結果今日都算唔錯, 起初諗住咁耐唔跑實跟唔到, 但反而今日都算跟得前面d人幾貼.
是日總結如下:

Lap 1: 2′ 01
Lap 2: 1′ 53
Lap 3: 1′ 58
Lap 4: 1′ 56
Lap 5: 1′ 53
Lap 6: 1′ 50
Lap 7: 1′ 44
Lap 8: 1′ 50
Lap 9: 1′ 43
Lap 10: 1′ 42

Avg: 1′ 51

No related posts.

睇左咁多年電視, 今年終於跟Ginny同佢班排球波友去紅館現場睇世界女排大獎賽2009 - 香港站. 今年香港站四隊參賽既隊伍分別係中國, 荷蘭, 波蘭同埋多明尼加共和國. 記憶所及既傳統強隊 (古巴, 巴西, 俄羅斯) 都冇份, 以為今站中國都應該冇乜問題, 點知尋日睇電視直播見到中國又唔生性輸左比波蘭, 所以今日都係帶住”睇場好波”既心情去睇, 冇乜諗過中國可以係呢站拎到冠軍.

我地12:45去到紅館, 坐低等到1:30左右就開始頭場: 波蘭 對 多明尼加共和國. 賽前多明尼加共和國已經兩戰兩敗, 波蘭又係尋日贏左國家隊, 以為比賽會好一面倒, 點知都要打足5局波蘭先贏到. 尾場既 中國 對 荷蘭 緊接係4:00左右開波, 國家隊最後贏局數3 - 1, 唔算係贏得好辛苦, 不過最終都只係得香港站既亞軍. 比較兩場比賽反而頭場好似好睇d.

現場睇既氣氛真係好好 (雖然曾經玩人浪失敗), 我地個位置又好正 (上圖為我地今日個位所見既view, thx 芥蘭買左個靚位), 比起係電視睇有立體感好多. 今日現場發生左一段小插曲: 係中國對荷蘭果場, 其中有幾球個球証誤判, 比全場噓到佢爆. 之後大會有條友仔係技術暫停果陣開咪話因為做緊電視直播, 叫d觀眾唔好噓. 你覺得香港人係呢個時候會比d咩反應?

總括黎講好享受今日既現場體驗. 比HKD220就可以係紅館坐足成日近距離睇波, 下年我諗我都會再入場支持!! 希望下年中國女排生性la!!

No related posts.